Friday, August 26, 2016

暑假歐遊 (一)

上星期完成25天歐遊回來。去了英國、奧地利,德國和瑞士。大部分時間在英國和奧地利,分別10天和9天,其餘只停留慕尼黑和蘇黎世。

今次出門,特別擔心細仔會出事。幾年前,第一次帶阿仔歐遊,兩兄弟係馬德里apartment 內跳上sofa玩,玩得太激,細仔跌落地,額頭給牆邊雜物割損,眼眉對上,傷口見到真皮,約兩厘米長。當時晚上十點,立即抱細仔落街打的,唔識西班牙文,唔緊要,額頭傷口說明一切,的士司機車了我地去兒童醫院。從此細仔額頭多佐條疤痕。兩年前遊韓國,細仔哮喘發作。另外兩次日本遊,一次發燒,呢一次小事。另一次大件事,上年聖誔節,係長野,首先一天多己食乜嘔乜,跟住發高燒,燒到104度,深夜12點call 救護車車入院,外面正落大雪,沿途見到好多摌雪車係公路上工作,個次真係好驚。今次一切平安, 興幸。

英國段:
由於所有機票都是飛行里數換取,一家四口換4張,唔容易換到,因為每班機得幾張免費位。去歐洲,中午航班比較少人搭,容易啲換。壞處是日機唔想睡覺。 但落機是晚上8點半,即是香港時間03:30。攜帶大小行理加上兩個豆丁坐火車去住宿地點,倫敦甘大多數要轉車,極之唔方便,再加上坐了十幾小時日機,細路仔一定好攰。一程機場至市中心接送約80鎊,但是10天租車只須250鎊。所以撰擇機場直接取車,阿爸一個辛苦好過全家辛苦。至於住宿,搵有免費車位的已可解決泊車費問題。


遊倫敦,住市中心未必好,房細和房租貴。無論住市中心近那一個地鐵站,遊主要景點多數要轉地鐵線,所以未必省到交通時間。我今次安排是住 zone 3 Greenwich,傳統的維多利亞式apartment,廳大房大,仲有超大廚房。門前花園可泊車,駕車5分鐘到 North Greenwich tube station,park + ride, 坐Jubilee line 入zone 1 唔使10分鐘。泊車weekend full day 6鎊,weekdays full day 11鎊。

Greenwich 附近都有唔錯景點,如Greenwich Observatory Museum, Cutty Sark, etc。Greenwich Observatory Museum位處格林威治時間起點, 館內有很多關於時間量度的歷史,有教育意義。

當時身處本初子午線,世界時間計算的起點。Longitude = 0。



從Greenwich Park 遙望對面Canary Wharf 金融中心。附近大部分新樓的業主都是亞洲人。



由倫敦駕車上曼城,約370km, 只有M6 公路要收錢, 唔使6鎊。Google maps 越來越好用,實時tube lines 和 national rail 交通情況,導航功能己經超越商用導航軟件。以前自己裝Tomtom係smartphone,現在可以省卻。




係曼城,住係自己的單位,租約係我到步前3天約滿,所以自己小住幾天。每天早上車兩個仔去上day camp,黃昏接佢地回家。佢地都幾enjoy 個camp,仲玩佐個 Monopoly Empire board game,香港好似沒凡唔覺有得買,所以當地買佐。



玩法跟大富翁有小小唔同, 地名變成國際品牌, 但是有些品牌已經out,  eg. Yahoo.


單位附近有露天車位,24小時6鎊,沒有閘口,自由出入,好方便。


周未去了探訪一對夫婦,舊同事,兩個都快退休。男主人叫Micheal,一個資深工程師,曾經係世界各地參與發電廠興建。女主人財務出身,做到FD,但會因為Michael被派去唔同國家而轉工,財務職位係唔同國家都相對容易搵工。

佢地住在Peak District National Park內,那一區手提電話訊號認真麻麻,好多位置收唔到,一公里方圓內只有幾戶人,真的有點與世隔絕,但每天返工只須45分鐘車程。由曼城駕車約個半小時。

Peak District National Park 是英國第一個國家公園,有豐富歷史背景,有好多古羅馬帝國足跡,附近小鎮Buxton為古羅馬人所建立,當時已發現有地下有豐富泉水,現時還有礦泉水出產。在山區多處隱約留下因古羅馬馬車行經而凹陷的山路。天陰的時候,置身山路上,遙望一大片的草原,有種荒涼的感覺,不其然想起米路吉的Braveheart電影 。山中的小村落,星期天的市集現時還有以物換物的交易。佢地有時會用雞蛋換其他食物,頑有趣。

佢地住係石屋,建於16世紀,即有五百年歷史。兩夫婦非常喜歡休閒生活,所以二十年前買佐呢個小農場,位處河邊,有兩間石屋,屋前一大片草地。最特別的是河邊有個小水池,池水來自地下泉水,所以冬天周圍舖滿白雪,池水唔會結冰。佢地都養了唔少家禽。




今次是第三次探訪,頭兩次是工幹順道探訪。間屋加建了玻璃屋,大大提高了間屋舒適度,因為可以係室內享受陽光。縱使夏天,室外很多時都很清涼。

呢個水池終年不結冰, 鴨仔冬天可以日日浸溫泉。

兩個都有揸大型游艇牌照,所以每年都會租遊艇出海渡假,作兩三星期的海上航行,有時會由一個港口出發,航行去另一個港口還船。多數會租可容納約十人住的遊艇,所以每人所分擔的船租唔會好貴。佢地多數去地中海,希望幾年後,阿仔大個,三父子一齊跟佢地出海。老婆唔熟水性,唔會去。至於安全問題,完全唔擔心,佢地經驗老到,遊艇有先進設備發出求救訊號,每個人都會配帶GPS 定位,只要唔死得,一定有人來救。佢講笑話死佐都一定搵到條屍。

附近有遊艇會,Michael 帶我地去玩帆船,阿仔第一次玩。


我跟他們分享曼城買樓收租經過,佢地又講術退休安排。打算係法國南部買間屋作退休居所,仲俾佐Rightmove posting printout我睇,開價750k 歐羅,約六百五十萬港元,約九龍區兩房價,香港好多人都負擔得到。另外買一艘遊艇,約三十米長,可容納10個人住,約150k歐羅。

每年暑假,好多法國人 都會去南部渡假。因為景色怡人,氣候溫和。我都去過好幾次,大小城鎮和村落依然好有中世紀feel。在Nimes 和 Arles 依然保留兩個完整的古羅馬鬥獸場,還有凡高筆下的小村莊。

睇鬥牛唔一定去西班牙,法國南部都有。大仔半歲時兩公婆南法遊時攝,


在Valensole 有一望無際的lavender, L'OCCITANE的起源地。2013年夏,獨自一人在南法過周未。

Michael 兩夫婦只是普通打工仔,相等於香港讀工程和商科出身,但是他們的退休安排,從香港打工仔角度看,一點也普通。縱使總共唔係好多錢,有幾層供完的樓已經夠(香港有好多人), 但這一群人唔會諗到,大家會以為呢啲係富豪級生活。在工作上,去過二十多個國家,體驗到好多唔同生活方式。

早幾年,拒絕被委派去外國工作,原因為了想阿仔學多幾年中文,否則同樣的生活絕對觸手可及。沒有後悔,深信將來還有機會。